16/05/2026
அறிவித்தல்கள்: Digital ஓவியம், சுவர் ஓவியம் மற்றும் குறுந் திரைப்படப் போட்டிகள்.
யாழ்ப்பாணக் கலைஞர்கள் மன்றத்தினர் (Jaffna Artists Forum) ஆகிய நாங்கள் விலங்கு உரிமைகள் தொடர்பான விழிப்புணர்வு பிரச்சாரத்தை முன்னெடுத்து வருகிறோம். குறிப்பாக செல்லப் பிராணிகளைப் பராமரிப்பது பற்றியும் அவற்றைக் கைவிட வேண்டாம் என்று கேட்டும் பிரச்சாரம் செய்கிறோம்.
இதன் ஒரு பகுதியாக, யாழ்ப்பாணத்தில் தெரிவு செய்யப்பட்ட சில ஆரம்பப் பாடசாலைகளில் நாடக ஆற்றுகைகள் ஏற்கெனவே செய்துள்ளோம். ஆசிரியர்களும் மாணவர்களும் இவற்றை விரும்பிப் பார்த்து, தொடர்ந்தும் இன்னும் பல நாடகங்கள் செய்யுமாறு கேட்டுக்கொண்டுள்ளனர்.
நாங்கள் ஒரு சிறிய காணொளி விளம்பரத்தை அண்மையில் வெளியிட்டிருந்தோம். இதை நீங்கள் எங்கள் Facebook பக்கத்தில் பார்க்கலாம். இது விரைவில் திரையரங்குகளில் காட்சிப்படுத்தப்பட உள்ளது. சமூக ஊடகங்களில் வெளியானதிலிருந்தே இது பற்றி ஏராளமான நல்ல கருத்துக்கள் கிடைத்துள்ளன. இதனைத் தமது சமூக ஊடகங்களில் பகிர்ந்தவர்கள், கருத்து தெரிவித்தவர்கள், மற்றும் பயனுள்ள பின்னூட்டங்களை வழங்கியவர்கள் அனைவருக்கும் நன்றி.
பாடசாலை மட்டத்தில் நாங்கள் ஒரு ஓவியப் போட்டியை நடத்தினோம், அதில் சில அருமையான படைப்புகள் சமர்ப்பிக்கப்பட்டன. இப்போது, நாங்கள் இந்த ஓவியப் போட்டியை பெரியவர்களுக்கும் சேர்த்து நடத்துகிறோம். வயது இதற்கு ஒரு தடையல்ல. மூன்று பிரிவுகளில் போட்டி நடத்தப்படும்:
1. சுவர் ஓவியம்
2. Digital ஓவியம் (இவை சுவர்களில் அல்லது விளம்பரப் பலகைகளில் காட்சிப்படுத்தப்படும்)
3. குறுந் திரைப்படங்கள் (தமிழில்).
சுவர் ஓவியம் மற்றும் Digital ஓவியப் போட்டிகளில் பங்குபற்றுபவர்கள் வடமாகாணத்தைச் சேர்ந்தவர்களாக இருக்க வேண்டும். காரணம் இவர்கள் தமது ஓவியங்களை யாழ்ப்பாணத்தில் தெரிவு செய்யப்பட்ட இடங்களில் தாமாக நேரில் வந்து வரைந்து கொடுக்க வேண்டும். குறுந் திரைப்படப் போட்டியில் நாட்டில் உள்ள எவரும் பங்குபற்றலாம். தமிழ் பேசும் பகுதிகளில் இந்த விழிப்புணர்வு முயற்சி செய்யப்பட இருப்பதால், குறுந் திரைப்படங்களின் மொழி தமிழாக இருக்க வேண்டும்.
இவ் விடயத்தை உங்கள் நண்பர்களுடன் பகிருங்கள். விலங்குகள் மீது அன்புள்ளவர்களுக்கும் கலைஞர்களுக்கும் இதைத் தெரியப்படுத்துங்கள். இவ் விடயங்கள் தொடர்பான கலை ஆக்கங்களும் உரையாடல்களும் அவசியமானவை. நன்றி.
