Francis Skaryna Belarusian Library and Museum in London

31/05/2026

Беларуская бібліятэка і музэй ім. Ф. Скарыны ў Лёндане і Згуртаваньне Беларусаў у Вялікай Брытаніі сардэчна запрашаюць на сустрэчу з Паўлам Севярынцам і прэзэнтацыю ягонае новае кнігі «Беларусь – гэта сьвятое» ў пятніцу 5 чэрвеня 2026 году а 18:30 (37 Holden Road, London N12 8HS, станцыя мэтро Woodside Park)
«Беларусь – гэта сьвятое» – першая пасля турмы кніга пісьменьніка, палітыка і былога палітвязьня Паўла Севярынца, зборнік-сьведчаньне, створаны за кратамі.
У кнізе 71 малюнак беларускіх храмаў – Павел маляваў іх для свайго сына Францішка, – 71 выслоўе, якое дапамагае знайсьці апірышча ў цяжкія часы, і 22 вершы, большасьць зь якіх публікуецца ўпершыню.
Кнігу можна будзе атрымаць на прэзэнтацыі з аўтографам аўтара. Напрыканцы вечарыны запрашаем на сьціплы пачастунак.

Да сустрэчы можна будзе далучыцца праз зум па спасылцы https://us02web.zoom.us/j/82994964102?pwd=WaVeVt1UrtlbX8vA0m0jbJFRSJaklZ.1

19/05/2026

29 красавіка 2026 г. у Бібліятэцы імя Тараса Шаўчэнкі ў Лёндане прайшоў сымпозіюм „Неадступная песьня“ у гонар Веры Рыч (1936–2009) — ангельскай паэткі, публіцысткі, перакладніцы ўкраінскай і беларускай літаратуры на ангельскую мову.

Сымпозіюм сабраў беларускіх, украінскіх і брытанскіх навукоўцаў, пісьменнікаў, перакладнікаў і сяброў паэткі. Побач з акадэмічнымі дакладамі тут гучалі ўспаміны і паэтычныя чытаньні ды імправізацыі, і ўвесь дзень стаў данінай любові і ўдзячнасьці выдатнай паэтцы і яркай асобе, якая зрабіла адметны ўнёсак у літаратуру, пераклад і культурны дыялёг.

Выступы сымпозыюму, які адбываўся на ангельскай, беларускай і ўкраінскай мовах, цяпер можна паглядзець у запісе: https://m.youtube.com/playlist?list=PLw4dsUmSAsT62a9iqiYChFJXkj0oIPxFq&si=WmLARniRpdR2ft7w

Сымпозіюм правялі ўкраінская Бібліятэка і архіў імя Т. Шаўчэнкі і Беларуская бібліятэка і музэй імя Францішка Скарыны.

16/05/2026

Скарынаўская бібліятэка прыняла другі дзень 11 й Канфэрэнцыі беларускіх дасьледаваньняў

9 траўня Скарынаўская бібліятэка мела гонар прыняць удзельнікаў і ўдзельніцаў другога дня 11 й штогадовай Канфэрэнцыі беларускіх дасьледаваньняў. Гэтая падзея працягвае традыцыі англамоўнай беларусістыкі ў Брытаніі, закладзеныя беларусамі і іх брытанскімі сябрамі яшчэ ў 1950 я гады.

Падчас другога дня канфэрэнцыі былі прадстаўленыя новыя дасьледаваньні, прысвечаныя гісторыі, культуры, мове і сучасным працэсам у Беларусі.

Фотасправаздача і падрабязная інфармацыя — на старонцы канфэрэнцыі.

14/05/2026

Скарынаўская бібліятэка ёсьць месцам, вакол якога гуртуюцца розныя культурніцкія суполкі беларускай дыяспары. Адна зь іх — фальклёрны гурт «Вір» пад кіраўніцтвам фальклярысткі Эвеліны Шчадрыной, чые выступы ўжо сталі неад’емнай часткай беларускага жыцьця ў Брытаніі.

Калі вы яшчэ ня мелі магчымасьці пачуць і пабачыць нашых выбітных сьпевакоў, запрашаем паглядзець відэа, нядаўна запісанае ў садзе бібліятэкі. У ім гурт распавядае пра традыцыі сьвяткаваньня Юр’я ў Беларусі.

А калі жадаеце далучыцца да сьпеўнага гуртка — будзем радыя вас бачыць!

Сад Скарынаўскай бібліятэкі, 25 красавіка 2026.

11/05/2026

Рукапісны і рукатворны зборнік Ларысы Геніюш: створаны ў Празе, захаваны ў Лёндане

Напрыканцы 1980-х у калекцыю Скарынаўскае бібліятэкі быў перададзены ўнікальны артэфакт — невядомы датуль рукапіс паэтычнавга зборніка Ларысы Геніюш, які яна сама перапляла ў брашуру. У ім — вершы 1945-47 гг., створаныя ў Празе перад арыштам і высылкай аўтаркі ў савецкі Гулаг.

Рукапіс быў расчытаны брытанскім беларусістам-літаратуразнаўцам Арнольдам Макмілінам і а. Аляксандрам Надсанам, і ў 1992 годзе ў Скарынаўскай бібліятэцы выйшла машынапіснае, памножанае на ксэраксе выданьне зборніка. Яно запоўніла доўгі прагал паміж першай, адзінай нецэнзураванай кнігай паэткі (“Ад родных ніў”, Прага, 1943) і выданьнямі, што выходзілі ў БССР.

З часам значнасьць другога праскага зборніка паэткі станавілася больш відавочнай. На думку гісторыцы Тацьцяны Астроўскай, спэцыялісткі ў беларускім дысыдэнцкім руху, “рукапісны і рукатворны — гэты зборнічак можа і павінен разглядацца як пачатак беларускамоўнага паваеннага сам- і тамвыдаву”.

Сёньня зьявілася магчымасьць і патрэба зірнуць на зборнік, прачытаць і асэнсаваць яго па-новаму. Неўзабаве ў выдавецтве Skaryna Press выходзіць ягонае факсымільнае выданьне зь вершамі ў новай рэдакцыі і трыма артыкуламі, якія раскрываюць кантэкст, гісторыю, значэньне і мову зборніка.

Чытаць пра зборнік на сайце выдавецтва: https://skarynapress.com/naviny/larysa-hienijus/

10/05/2026

СЫМПОЗІЮМ ДА СТАГОДЗЬДЗЯ АЙЦА АЛЯКСАНДРА НАДСАНА

Беларуская бібліятэка і музэй імя Ф. Скарыны і Інстытут беларускае мовы запрашаюць да ўдзелу ў моўным сымпозіюме ў гонар стагодзьдзя айца Аляксандра Надсана, які пройдзе 18-19 верасьня 2026 г. ў Скарынаўскай бібліятэцы ў Лёндане і онлайн.

Адносіны да якой-колечы мовы - найлепшы паказьнік нашых адносінаў да народу, які зьяўляецца яе носьбітам.
а. Аляксандар Надсан

Айцец Аляксандaр Надсан – сьвятар, навукоўца, дзеяч беларускай эміграцыі, зрабіў унёсак у многія дысцыпліны.

Велізарным быў ягоны даробак як лінгвіста і перакладніка літургічных і біблійных тэкстаў. Архівы Скарынаўскае бібліятэкі захоўваюць каштоўную перапіску айца з заходнімі беларусістамі і мовазнаўцамі ў Беларусі, рукапісы і цэлы корпус літургічных тэкстаў у ягоным перакладзе.

Сымпозіюм мае на мэце прыцягнуць увагу навуковае супольнасьці да ўнёску айца Аляксандра Надсана ў мовазнаўства і агулам у беларускі гуманітарны дыскурс і стымуляваць дасьледаваньні філёлягаў, зьвязаныя зь ягонай спадчынай.

Тэматычныя напрамкі сымпозіюму:
- моўная спадчына айца А. Надсана ў кантэксьце беларускай мовазнаўчай традыцыі;
- падыходы айца А. Надсана да біблійнага перакладу;
- стан і папаўненьне мовазнаўчае калекцыі Скарынаўскае бібліятэкі;
- стварэньне корпусу тэкстаў А. Надсана;
- выданьне неапублікаванае спадчыны А. Надсана;
- рэдкія выданьні ў фондах бібліятэкі;
- дасьледаваньні мовы беларускае дыяспары;
- прэзэнтацыя кнігі Уладзіслава Гарбацкага, якая прадстаўляе інтэлектуальны партрэт А. Надсана.

Тэзісы выступаў будуць апублікаваныя на вэбсайце Скарынаўскай бібліятэкі. Па выніках мерапрыемства плянуецца выданьне зборніка матэрыялаў.

Мовы мерапрыемства: беларуская, ангельская.

Заяўкі на ўдзел дасылайце да 1 чэрвеня 2026 г. праз форму: https://forms.gle/yQAFhiEdRyNS9FeS7.

Па ўсіх пытаньнях зьвяртайцеся на адрас: [email protected].

05/05/2026

❗️❗️❗️Кіраўніца Вольнага хору і добрая сяброўка нашае бібліятэкі Галіна Казіміроўская ў бядзе — яна змагаецца з анкалягічнай хваробай. ❗️❗️❗️

Апошнія некалькі гадоў Галіна дасьледавала і апрацоўвала спадчыну кампазытара Міколы Куліковіча, якая захоўваецца ў нашым архіве. У 2024 г. Галіна і ейны хор Concordia прыяжджалі з канцэртамі ў Лёндан і выступалі з праграмай "Гучыць Скарынаўка" ў царкве Сьв. Кірылы Тураўскага і Ўсіх Сьв. Апекуноў Беларускага Народа.

Дапамагчы Галіне Казіміроўскай можна пералічыўшы грошы на рахунак Беларускага Харытатыўнага Фонду ў Брытаніі (UK charity number: 1057033). Падаткаплацельшчыкі Брытаніі могуць пералічыць сродкі праз CAF. Усе сабраныя сродкі будуць накіраваныя непасрэдна Галіне.

Bank Name: Barclays Bank

Account Name: Belarusian Charitable Trust Limited Donation Account

Sort Code: 20-46-60

Account No: 60103446

SWIFTBIC: BUKBGB22

IBAN: GB32 BUKB 2046 6060 1034 46

❗️Please designate your donation “For Galina Kazimirouskaya”❗️

05/05/2026

Свабода пагутарыла зь беларусам, датычным да працы Скарынаўскай бібліятэкі ў Лёндане, дзе захоўваецца частка архіву БНР, якая сёлета трапіла ў яе фонды.