09/11/2025
🚃 ,,ლურჯა" ბევრისთვის ბავშვობის ან ახალგაზრდობის მოგონებაა, ზოგისთვის უბრალოდ ძველი მატარებელი.
💙 სინამდვილეში კი უკვე მისი ისტორიული მნიშვნელობაც დიდია და სამწუხაროა, რომ დღეს ის სამუზეუმო ექსპონატს არ წარმოადგენს და უბრალოდ ჯართადაა განწირული.
🤔 რატომ არის მნიშვნელოვანი,,ლურჯა"? ამის შესახებ სფეროს ექსპერტების აზრს წარმოგიდგენთ.
🚃 ,,ლურჯა", რეალურად Ср3 სერიის ელექტროსექციის ვაგონი, საბორტე ნომრით 1510 თბილისის სამგზავრო სავაგონო დეპოდან, რომელიც ადრე სურამი-ხაშურის მონაკვეთზე მოძრაობდა.
✏️ Ср3 სერიის ელექტრომატარებლები:
სანამ უმეტესობისთვის ნაცნობი Эр1 და Эр2 სერიის ელექტრომატარებლები (ე.წ. „ელექტრიჩკები“) გამოვიდოდა, ყოფილი საბჭოთა კავშირის ელექტრიფიცირებულ მაგისტრალებზე, და მათ შორის, საქართველოში, მოძრაობდნენ კვადრატული ფორმების მქონე Сд, См, Ср და Ср3 სერიის ელექტრომატარებლები. 1970-იან წლებამდე სწორედ ეს ელექტრომატარებლები წარმოადგენდნენ საქართველოს რკინიგზის საგარეუბნო მოძრაობის ძირითად საშუალებებს. მათ გარეშე შეუძლებელი იყო ჩვენი რკინიგზის ნებისმიერი სადგურის წარმოდგენა. მასიურად ამ სერიის ელექტრომატარებლების ჩამოწერა 1970-იან წლებში დაიწყო.
2000-იანებში ჯერ კიდევ დადიოდა Ср3 სერიის ბოლო ელექტრომატარებელი ხაშური-სურამის მონაკვეთზე, რომელსაც ადგილობრივები „ლურჯას“ ეძახდნენ.
СР3 ელექტრო სექციის ვაგონი 1956 წელს იყო წარმოებული, ხოლო ხაშურის დეპოში იგი 1966 წელს შემოვიდა. მოგვიანებით სამ ვაგონიანი მხოლოდ ერთი - 1510 ნომერი დარჩა, რადგან ორი ვაგონი ჩართში იქნა ჩაბარებული. 2010-იან წლებში ამ ვაგონის მოძრაობაც შეწყდა და ის თბილისში შესანახად გადაიტანეს. თუმცა, სამწუხაროდ, ბოლო აუქციონზე ისიც ჯართად გამოტანილი ტექნიკის სიაში აღმოჩნდა.
ამ და სხვა ინფორმაციის საფუძველზე, სამართლიანია მოვითხოვოთ, რომ ვაგონი გადაეცეს ხაშურის მუნიციპალიტეტს და ერთხელ და სამუდამოდ ,,ხაშურის რკინიგზის მუზეუმში" დაიდოს ბინა. მუზეუმის შექმნა კი აწმყოს და მომავლის მნიშვნელოვანი პერსპექტივა უნდა იყოს.
✏️ მომზადებულია გიორგი ბაბუნაშვილის მასალების მიხედვით.
