06/08/2026
*பொன்னமண்டா லட்சுமணசாமி வர்மா: ஆந்திர, தமிழக வன்னியர்கள் உரிமைக்காக பாடுபட்ட மாமனிதர்!*
*“ஆகஸ்ட் 7-இல் பிறந்த நாளை கொண்டாடுவோம்*
ஆந்திராவிலும் சென்னை மாகாணத்திலும் வன்னியர்கள் உரிமைக்காகப் போராடிய ஒரு முதன்மையான போராளி, பொன்னமண்டா லட்சுமணசாமி வர்மா அவர்கள் ஆவர்.
சமுதாயத்தில் ஒரு மதிக்கத்தக்க நிலையில் 15ஆம் நூற்றாண்டு வரை இருந்த வன்னியர்கள் அதன் பின்னர் படிப்படியாக அதிகாரத்திலிருந்து ஓரங்கட்டப்பட்டு - 19ஆம் நூற்றாண்டில் 'அடிமை சாதி' எனும் நிலைக்குத் தள்ளப்பட்டனர். (அந்தக்காலத்தில் தாழ்ந்த சாதி என்பது - சாதி மக்களை ஒதுக்கி வைப்பதாகும். இன்று போல உரிமை அளிப்பது அல்ல).
பறையர், பள்ளர், பள்ளி என ஒடுக்கப்பட்ட சாதிகளில் வன்னியர்களும் ஒரு சாதி என்கிற சதிவலை 19ஆம் நூற்றாண்டில் பின்னப்பட்டது. இந்த சதிக்கு எதிராகவே வன்னியர்களின் முதல் ஒற்றுமை ஏற்பட்டது. இந்தச் சதிக்கு எதிராக 1870ஆம் ஆண்டு வாக்கில் ஒன்றிணைந்த வன்னியர்கள் 1888ஆம் ஆண்டு வன்னிய குல சத்திரிய மகா சங்கத்தைப் பதிவுசெய்தனர்.
பறையர், பள்ளர், பள்ளி என்கிற பட்டியலில் 'பள்ளி' இல்லை. நாங்கள் 'வன்னிய குல சத்திரியர்கள்' என்று ஆங்கிலேயரின் சாதிவாரி மக்கள் தொகைக் கணக்கெடுப்பை மாற்ற அந்தச் சங்கம் போராடியது. சங்கம் சேகரித்த பணம் போடப்பட்டிருந்த அர்பத்நட் வங்கி திவால் ஆனதால் - சங்கமும் தேய்ந்து போனது.
"உரிமை காத்தவர்"
வன்னியர்களைச் சத்திரியர்கள் என்று குறிப்பிட வேண்டும் என்பதற்காகத் தொடங்கிய சங்கம் நலிவடைந்தாலும், அந்தக் கோரிக்கை நலிவடையவில்லை. ஆந்திராவின் கிழக்குக் கோதாவரி மாவட்டத்தில் - அக்னிகுல சத்திரிய மகா சங்கத்தின் தலைவராக இருந்த லட்சுமணசாமி வர்மா அவர்கள் போராடி, 1929ஆம் ஆண்டில் இதற்கான அரசாணையை வெளியிடச் செய்தார்.
அரசு ஆவணங்களில் பள்ளி என்கிற பெயர் இனி இடம்பெறாது எனவும், பல்வேறு பெயர்களில் அழைக்கப்படும் அனைத்து வன்னியர்களும் - தமிழகத்தில் 'வன்னியகுல சத்திரியர்கள்' என்றும் ஆந்திராவில் 'அக்னிகுல சத்திரியர்கள்' என்றும் அழைக்கப்படுவார்கள் என்றும் 1929ஆம் ஆண்டில் சென்னை மாகாண சபை தீர்மானம் நிறைவேற்றியது. இந்தச் சாதனைக்குக் காரணமானவர்தான் பொன்னமண்டா லட்சுமணசாமி வர்மா அவர்கள்.
வன்னிய குல சத்திரிய மகா சங்கமும் லட்சுமணசாமி வர்மா அவர்களும் - வன்னியர் ஒவ்வொருவர் வாழ்விலும் இப்போதும் வாழ்கின்றனர். இன்று அனைத்து வன்னியர்களின் சாதிச் சான்றிதழிலும் "வன்னிய குல சத்திரியர்" (Vanniyakula Kshatriya) என்று சாதியின் பெயர் இருப்பதற்கு இதுதான் காரணம்.
ஆண்டுதோறும் ஆகஸ்ட் 7ஆம் நாளன்று பொன்னமண்டா லட்சுமணசாமி வர்மா அவர்களின் பிறந்தநாள் விழா ஆந்திர மாநிலம் விஜயவாடா அருகே உள்ள பீமாவரத்தில் நடந்துவருகிறது.
"அதிகாரப்பூர்வ அரசு விழா"
கடந்த மாதம் ஜூலை 29 அன்று மாமல்லபுரத்தில் நடந்த பாட்டாளி மக்கள் கட்சி பொதுக்குழுவில் – ஆந்திர பிரதேச மாநிலத்தில் பாமக தொடங்கப்படும் என மருத்துவர் அன்புமணி இராமதாஸ் அவர்கள் அறிவித்தார்கள்.
அதே நாளில், பொன்னமண்டா லட்சுமணசாமி வர்மா அவர்களது பிறந்த நாள் (ஆகஸ்ட் 7) அதிகாரப்புர்வ அரசு விழாவாக கொண்டாடப்படும் என ஆந்திர மாநில அரசு அரசாணை வெளியிட்டுள்ளது. அனைத்து அரசுத்துறை செயலகங்கள், துறை தலைமை அலுவலகங்கள், அனைத்து மாவட்ட ஆட்சியர் அலுவலகங்களில் ஆகஸ்ட் 7 அன்று பொன்னமண்டா லட்சுமணசாமி வர்மா பிறந்தநாள் விழாவை ஆண்டுதோறும் கொண்டாட வேண்டும் என அந்த அரசாணையில் உத்தரவிடப்பட்டுள்ளது.
தமிழ்நாட்டிலும் உலகெங்கிலும் பொன்னமண்டா லட்சுமணசாமி வர்மா அவர்களது பிறந்த நாளை ஒவ்வொரு ஆண்டும் கொண்டாட வேண்டும்.
