មជ្ឈមណ្ឌលសកម្មភាពកំចាត់មីនកម្ពុជា - CMAC

02/06/2026

01/06/2026

អបអរសាទរទិវាកុមារអន្តរជាតិខួបលើកទី៧៧។ ទិវានេះត្រូវបានប្រារព្ធឡើងក្នុងគោលបំណងដើម្បីលើកកម្ពស់សិទ្ធិកុមារនៅជុំវិញពិភពលោក ជាពិសេសគឺដើម្បីការពារកុមារពីការជិះជាន់ កេងប្រវ័ញ្ចកម្លាំងពលកម្ម ការជួញដូរផ្លូវភេទ ការប្រើប្រាស់អំពើហិង្សា ការរំលោភបំពានសិទ្ធិ និងអសមភាពសង្គម ដែលតែងកើតមានឡើងចំពោះកុមារ។

29/05/2026

នៅថ្ងៃទី២៨ ខែឧសភា ឆ្នាំ២០២៦ នៅចំណុចអូរ ភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ មានករណីប្រជាពលរដ្ឋម្នាក់បានបាត់បង់ជីវិតដោយសារគ្រោះថ្នាក់កាប់ឈើឧស ប៉ះគ្រាប់បែកចង្កោមផ្ទុះស្លាប់នៅហ្នឹងកន្លែង។ គ្រាប់បែកចង្កោមនេះជាប្រភេទគ្រាប់បែកចង្កោមM46 ដែលជាសំណល់គ្រាប់បែកចង្កោមពីសង្គ្រាមសៀមឈ្លានពាន។ កម្លាំងជំនាញអង្គភាពCMACបានបោសសម្អាតធានាសុវត្ថិភាពនៅតំបន់តាមលំនៅដ្ឋានរបស់ប្រជាពលរដ្ឋក្នុងភូមិនេះទាំងស្រុងនិងបានហ៊ុំពន្ធ័ដាក់ស្លាកសញ្ញាតំបន់ព្រៃខាងក្រោយភូមិនេះនិងតំបន់កសិកម្មមួយចំនួនជាអាទិភាពបន្ត។
សូមចូលរួមរំលែកទុក្ខចំពោះមរណភាពរបស់ប្រជាពលរដ្ឋជនសុីវិលស្លូតត្រង់ ដោយសារគ្រាប់បែកចង្កោមសៀមឈ្លានពានដែលជាទង្វេីប្រឆាំងអនុសញ្ញាហាមប្រាមការប្រេីប្រាស់គ្រាប់បែកចង្កោមក្រុងអូស្តូ។

27/05/2026

នៅថ្ងៃទី២៧ ខែឧសភា ឆ្នាំ២០២៦ នៅស្រុកមោងឫស្សី ខេត្តបាត់ដំបង មានករណីគ្រោះថ្នាក់ដោយសំណល់សង្គ្រាមគ្រាប់៦០មីលីម៉ែត្រមិនទាន់ផ្ទុះ ដោយសារការដុតសម្អាតដីដាំដំណាំបានបង្កផ្ទុះបណ្តាលឱ្យយុវជនម្នាក់រងរបួសធ្ងន់។ នៅក្នុងខែឧសភានេះ មានករណីគ្រោះថ្នាក់ដោយសារគ្រាប់សំណល់សង្គ្រាម៣-៤ករណីហេីយ ដែលបណ្តាលមកពីការលេីកដាក់ឬវាយដុំដុតគ្រាប់មិនទាន់ផ្ទុះ។ សូមចូលរួមសោកស្តាយនិងមរណទុក្ខជាមួយជនរងគ្រោះនិងក្រុមគ្រួសារ ព្រមទាំងសូមអំពាវនាវប្រជាពលរដ្ឋទាំងអស់ ចូលរួមប្រុងប្រយត្ន័និងកុំប៉ះពាល់ វាយដុំដុតគ្រាប់មិនទាន់ផ្ទុះ និងត្រូវរាយការណ៍មកសមត្ថកិច្ចនគរបាលប៉ុស្តឬអាជ្ញាធរមូលដ្ឋានភូមិ/ឃុំ និងជាពិសេសមកអង្គភាពCMAC ដេីម្បីសុខសុវត្ថិភាពខ្លួនឯងនិងអ្នកជុំវិញខ្លួន។

27/05/2026

តើមានបងប្អូនណាខ្លះធ្លាប់បានមកទទួលការបណ្តុះបណ្តាលនៅវិទ្យាស្ថានបច្ចេកទេសសកម្មភាពកំចាត់មីន ខេត្តកំពង់ឆ្នាំង? អគារថ្មីៗ បរិក្ខាថ្មីៗ កំពុងរង់ចាំទទួលលោកអ្នកដើម្បីបណ្តុះបណ្តាលក្នុងវិស័យសកម្មភាពមីន!

21/05/2026

នេះជាទង្វើដែលអាចបង្កជាការផ្ទុះ☠️ ហើយអាចនឹងធ្វើឱ្យអ្នកមានវិប្បដិសារីអស់មួយជីវិត។
❌សូមកុំយកគម្រូតាមគាត់ឱ្យសោះ និងរាយការណ៍មកអង្គភាពCMACតាមលេខដែលមាននៅក្នុងវិដេអូនេះប្រសិនបើលោកអ្នកប្រទះឃើញគ្រាប់មីន ឬគ្រាប់យុទ្ធភណ្ឌមិនទាន់ផ្ទុះគ្រប់ប្រភេទ!

20/05/2026

Handover Ceremony of Achievements under the Integrated Mine Clearance and Victim Assistance Project Phase II and Ground Operation Commencement of the Project Phase III, Supported by Grant Aid from the Government of Japan។
Embassy of Japan in Cambodia ស្ថានទូតជប៉ុននៅកម្ពុជា

19/05/2026

ពិធីផ្ទេរ-ប្រគល់សមិទ្ធផល គម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីន ដំណាក់កាលទី២និងការបើកគម្រោង ដំណាក់កាលទី៣គាំទ្រហិរញ្ញប្បទានឥតសំណងដោយរដ្ឋាភិបាលជប៉ុនក្រោមអធិបតីភាពឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្ដរជាតិតំណាងដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងឯកឧត្តម អ៊ូអិណុ អាត់ស៊ុស៊ិ (UENO Atsushi) ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា

18/05/2026

ថ្ងៃចន្ទ ២កើត ខែជេស្ឋ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១៨ ខែឧសភា ឆ្នាំ២០២៦ នៅមណ្ឌលអភិវឌ្ឍន៍ស៊ីម៉ាក់មរតកតេជោ ខេត្តបាត់ដំបង បានរៀបចំប្រារឰពិធីផ្ទេរ-ប្រគល់សមិទ្ធផល នៃគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី២ និងការបើកកិច្ចប្រតិបត្តិការគម្រោងថ្មី ដំណាក់កាលទី៣ ដែលជាហិរញ្ញប្បទានឥតសំណងរបស់រដ្ឋាភិបាលជប៉ុន ផ្ដល់ជូនរាជរដ្ឋាភិបាលកម្ពុជា គាំទ្រអង្គភាពCMAC ក្រោមអធិបតីភាពដ៏ខ្ពង់ខ្ពស់ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្ដរជាតិ និងលោក​ជំទាវ​ ខេង​ សំវ៉ាដា​ តំណាងដ៏ខ្ពង់ខ្ពស់បំផុត សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា​ និងលោកជំទាវ​បណ្ឌិត​ ពេជ​ ចន្ទមុន្នី​ ហ៊ុន​ ម៉ាណែត រួមជាមួយឯកឧត្តម UENO Atsushi ឯកអគ្គរដ្ឋទូតជប៉ុនប្រចាំកម្ពុជា។
សូមជម្រាបថា គម្រោងសមាហរណកម្មការបោស​សម្អាតមីន និងជួយសង្គ្រោះ​ជន​ពិការ​ដោយ​សារមីនដំណាក់កាលទី២នេះ រដ្ឋាភិបាលជប៉ុនបានសម្រេចផ្តល់ជំនួយហិរញប្បទានឥតសំណងមានទឹកប្រាក់សរុបចំនួន២.០០០លានយ៉េន ស្មើនឹងជិត​១៧លានដុល្លារអាម៉េរិក សម្រាប់រយៈពេល៤៥ខែ (០១ មេសា ២០២២ ដល់ថ្ងៃទី៣១ ធ្នូ ២០២៥) ដែលត្រូវអនុវត្តគម្រោងនៅខេត្តបាត់ដំបង ខេត្តពោធិ៍សាត់ និងខេត្តប៉ៃលិន ព្រមទាំងសម្រេចបានសមិទ្ធផលមានជាអាទិ៍៖ បោសសម្អាតផ្ទៃដីចម្ការមីន/គ្រាប់បានចំនួន១២.០១១ហិកតា ស្មើនឹង១២៧% ធៀបនឹងផែនការ។ រុករក​ឃើញនិងកម្ទេចចោលគ្រាប់មីន&គ្រាប់យុទ្ធភណ្ឌមិនទាន់ផ្ទុះគ្រប់ប្រភេទចំនួន២៧.៨៤៧គ្រាប់ និង​​ផ្ដល់សារអប់រំយល់ដឹងពីមីនបានចំនួន១២.៥៨២លើក មានប្រជាពលរដ្ឋចូលរួមសរុបចំនួន៣៤៣.២០៩​​នា​ក់។ ប្រជាពលរដ្ឋទទួលផលពីគម្រោងនេះមានចំនួន៧៦៣.៦០២នាក់។ សាងសង់ផ្លូវគ្រួសក្រហមប្រវែង៩.៨០០ម៉ែត្រ និងសំណង់រំដោះទឹកគ្រប់ប្រភេទចំនួន២៩កន្លែង ទិញសម្ភារបោសសម្អាត​​មីន​មួយចំនួន​រួមមាន៖ ម៉ាស៊ីនរាវមីន ALIS ចំនួន១២គ្រឿង គ្រឿងចក្របោសសម្អាតមីនKomatsu ចំនួន១គ្រឿង រថយន្តសណ្តោងចំនួន១គ្រឿង និងគ្រឿបន្លាស់ផងដែរ។
ដោយឡែកសម្រាប់គម្រោងថ្មី ដំណាក់កាលទី៣ ដែលត្រូវសម្ពោធបើកការដ្ឋាននៅថ្ងៃនេះ មានហិរញ្ញប្បទានឥតសំណងចំនួន១.៧០០លានយ៉េន ស្មើនឹងប្រមាណ១១លានដុល្លារអាមេរិក សម្រាប់រយៈពេល២៤ខែ(១៩ មករា ២០២៦-១៨ មករា ២០២៨) ដើម្បីគាំទ្រអង្គភាពCMAC លើគោលដៅដូចជា បោសសម្អាតផ្ទៃដីចម្ការមីន/គ្រាប់ចំនួន៤.៩៣៩ហិកតា ក្នុងភូមិសាស្រ្ដខេត្តពោធិ៍សាត់ ខេត្តបាត់ដំបង និងខេត្តកោះកុង ព្រមទាំងឆ្លើយតបសំណើសុំអន្ដរាគមន៍បន្ទាន់ក្នុងខេត្តប៉ៃលិន។ ការជួយសង្គ្រោះជនរងគ្រោះដោយសារមីន និងការអភិវឌ្ឍសហគមន៍ក្រោយបោសសម្អាតមីនរួច។ ទិញម៉ាស៊ីនរាវមីនALIS និងកសាងប្រព័ន្ធទិន្នន័យបញ្ញាសិប្បនិមិ្មត(AI)។
ឆ្លៀតក្នុងឱកាសនោះដែរ ឯកឧត្តមប្រតិភូ ហេង រតនា បានគោរពថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជនជប៉ុន​ដែលបានផ្តល់ជំនួយទាំងសម្ភារៈ និងថវិកា​ ដើម្បីគាំទ្រអង្គភាពCMAC ក្នុងការបោសសម្អាតមីននៅកម្ពុជា ជាពិសេសសម្ដេចមហាបវរ​ធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា​ ដែលបានផ្តល់ការគាំទ្រយ៉ាងពេញទំហឹងដល់អង្គភាពCMAC និងគោរពថ្លែងអំណរចំពោះឯកឧត្តម ឧបនាយករដ្ឋមន្រ្តី ដែ​លបានផ្ដល់ការគាំទ្រ និងតែងតែជួយសម្របសម្រួលគម្រោងនេះ។ ​ ក៏ដូចជាថ្លែងអំណរគុណចំពោះដៃគូអភិវឌ្ឍ និងម្ចាស់ជំនួយទាំងអស់ ដែលបានចូលរួមចំណែកក្នុងការអនុវត្តផែនការយុទ្ធសាស្រ្ដរបស់រាជរដ្ឋាភិបាល សំដៅឆ្ពោះទៅរកកម្ពុជាអស់ការគំរាមកំហែងដោយសារគ្រាប់មីនប្រឆាំងមនុស្ស​នៅត្រឹមចុងឆ្នាំ២០៣០ និងកាត់បន្ថយការគំរាមកំហែងដោយ​សារបញ្ហាសំណល់គ្រាប់យុទ្ធភណ្ឌសង្គ្រា​ម​ត្រឹមឆ្នាំ២០៣៥។

14/05/2026

ថ្នាក់ដឹកនាំ មន្រ្តី-បុគ្គលិកទាំងអស់នៃមជ្ឈមណ្ឌលសកម្មភាពកំចាត់មីនកម្ពុជា សូមព្រះបរមរាជានុញ្ញាតសម្តែងគារវកិច្ចក្នុងមនោសញ្ចេតនារំភើបរីករាយក្រៃលែងថ្វាយ ព្រះករុណាជា អម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ក្នុងឱកាសប្រកបដោយអភិសិរីមង្គលនៃព្រះរាជពិធីបុណ្យចម្រើនព្រះជន្មាយុរបស់ ព្រះករុណាជាអម្ចាស់ជីវិតលើត្បូង គម្រប់៧៣ យាង​ចូល៧៤ព្រះវស្សា សូមថ្វាយព្រះពរព្រះអង្គឆាប់ជាសះស្បើយពីព្រះរោ​គា និងមានព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លានិងព្រះជន្មាយុយឺន​យូរ។
នាឱកាសដ៏មហានក្ខត្តឫក្សវិសេសវិសាលនេះ ទូលព្រះបង្គំសូមលើកហត្ថប្រណម្យបួងសួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិទាំងឡាយក្នុងលោក មានទេវតារក្សាព្រះមហាស្វេតច្ឆត្រ ព្រមទាំងទេវតាឆ្នាំថ្មីព្រះនាម រាក្យសាទេវី សូមជួយប្រោះព្រំសព្ទសាធុការពរ សិរីសួស្ដី ជ័យមង្គល វិបុលសុខ បវរមហាប្រសើរថ្វាយ
ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គបានប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។