03/10/2026
အကောင်အထည်ဖော်ဖြစ်သည်ဖြစ်စေ
အကောင်အထည် မဖော်ဖြစ်သည်ဖြစ်စေ
စိတ်ကူးတိုင်းဟာ ဟောင်းသွားစမြဲပါပဲ
မနေ့က စိတ်ကူးပြီး ဒီနေ့လက်တွေ့လုပ်ဖြစ်တယ်ဆိုရင်တောင်မှ မနေ့ကစိတ်ကူးအဟောင်းကို ဒီနေ့လုပ်ဖြစ်သွားတဲ့သဘောမို့ စိတ်ကူးအဟောင်းကိုလက်တွေ့လုပ်မိသလိုဖြစ်ရပါတယ်။
တကယ်တော့ စိတ်ကူးတွေမှမဟုတ်ပါဘူး
အရာရာဟာ ဟောင်းသွားကြမှာပါ ....
ဘယ်အဟောင်းတွေ မနွမ်းပဲကျန်ခဲ့မလဲဆိုတာကလည်း စိတ်ဝင်စားဖို့ကောင်းလှပါတယ်။
ခြေထောက်ကျိုးလို့ ပတ်တီးစည်းတာကိုကျွန်တော်တို့တွေ့ဖူး မြင်ဖူးကြပါတယ်။ လက်ကျိုးရင် လက်မှာစည်း ၊ ခေါင်းကွဲရင် ခေါင်းမှာစည်း စသည်ဖြင့် ဒဏ်ရာအနာတရများအတွက် ပတ်တီးဟာ မိတ်ဖက်ပါပဲ .... ။ တကယ်တော့ ဒဏ်ရာကို ကုစားပေးဖို့ တစိတ်တပိုင်းအဖြစ် ပတ်တီးကတာဝန်ယူနေတာကြောင့် ပတ်တီးဆိုတာ ဝေဒနာကို ကုစားပေးတဲ့ အရာတွေထဲက တစ်ခုလို့ဆိုရင် မှားမယ်မထင်ပါ။
အခုပွဲမှာ Artist ကျော်နိုင်ဟာ ကျွန်တော်တို့ မြင်နေတွေ့နေကျ ပတ်တီးတွေကိုပဲ သူ့ပန်းချီကားတွေထဲ Collage အဖြစ်ထည့်သွင်းဖန်တီးထားတာကြောင့် Artist ရဲ့ ဝေဒနာ နဲ့ အဲ့ဒီဝေဒနာအပေါ်သူဘယ်လိုကုစားချင်နေလဲဆိုတဲ့ ခံစားမှုမျိုးတွေကိုပါ ခံစားနိုင်မှာဖြစ်ပါတယ်။ မန္တလေးမြို့မှာနေထိုင်တဲ့ ပန်းချီဆရာဟာ တချိန်က သူကြာမြင့်စွာနေထိုင်ရင်း ပန်းချီအနုပညာနဲ့မွေ့လျော်ခဲ့ရာမင်းကွန်းဒေသကိုနောက်ခံထားပြီး သူ့ခံစားမှုတွေကိုရေးချလိုက်တာကလည်း ထူးခြားတဲ့အကြောင်းအရာတစ်ခုဖြစ်ပါတယ်။ ဒါ့အပြင် လက်ရှိကာလအတောအတွင်းမှာရေးဖွဲ့ထားတဲ့ပန်းချီကားများဖြစ်တာကြောင့် ဖန်တီးသူရဲ့လက်ရှိခေတ်ကာလ ခံစားချက်များကိုပါ အမိအရဖမ်းဆုပ်နိုင်အောင် ထင်ဟပ်နေပါလိမ့်မယ်။
"ဘိုး ရာဟုလာက ကျွန်တော်တို့ပန်းချီကားတွေရောင်းရရင် တော်တော်ပျော်တာဗျ" လို့ Artist ကျော်နိုင်က ပြောပြတာကိုကျွန်တော်တို့ မှတ်သားဖူးပါတယ် ...
"သူက မော်ဒန်တွေကို ရောင်းရစေချင်တာဗျ" ... လို့လည်း သူက ဆက်ပြောပါတယ်
သဘောကတော့ ... ဆရာဟုလာ ရှိစဥ်က မင်းကွန်းမှာ မော်ဒန်ပန်းချီရေးတဲ့သူနည်းပုံရပါတယ်။ အဲ့ဒီ နည်းနည်းလေးတွေထဲက ဆရာကျော်နိုင်တို့လို ဆရာညမင်းကျော်တို့လို မော်ဒန်ပန်းချီရေးသူတွေရဲ့ ပန်းချီကားအချို့ ရောင်းရတဲ့အခါ ဆရာရာဟုလာကဝမ်းသာတတ်ပုံကို ပန်းချီကျော်နိုင်က ပြောပြလိုရင်းဖြစ်ပါတယ်။
ရောင်းရချင်း မရောင်းရချင်းတွေထက် မော်ဒန်ပန်းချီကိုလူတွေစိတ်ဝင်စားတာကိုမှ ပီတိဖြစ်တတ်တဲ့ ဆရာရာဟုလာကိုလည်း တမ်းတမိပါတယ်။
ဒီအချိန်မှာ ဆရာရာဟုလာ ရှိနေရင်
ဒီအချိန်မှာ ဆရာညမင်းကျော် ရှိနေရင် ....
သူတို့ မျက်နှာပြုံးပြုံးကြီးတွေနဲ့ ပီတိဖြစ်နေကြမှာလည်းသေချာပါတယ်။
"စိတ်ကူးအဟောင်းများ" လို့ အမည်ပေးထားပေမယ့် ပန်းချီကားတွေက အသစ်တွေဖြစ်ပါတယ်။ မန္တလေးမြို့မှာ ကိုကျော်နိုင်တစ်ခါမှမပြဖူးသေးတဲ့ Collage အများစုပါဝင်တာမို့ Artist Kyaw Naing ရဲ့ ရေးဟန်အသစ်တစ်မျိုးလို့လည်း ဆိုနိုင်ပါတယ်။
ပြပွဲကိုမလာနိုင်သေးတဲ့ မိတ်ဆွေများအတွက် ကိုကျော်နိုင်ရဲ့ "စိတ်ကူးအဟောင်းများ" ကိုတင်ဆက်လိုက်ပါတယ် ....
ဒဏ်ရာတွေဘေးက ကင်းဝေးကြပါစေဗျာ
