05/10/2026
Polarkveld på Ishavsmuseet fredag 9. oktober:
74 år etter tragedien: Brattind får ein plass på Ishavsmuseet
I 1952 forliste fem ishavsskuter i Vesterisen, og totalt 79 menn omkom. Blant dei var dei 14 mennene om bord på Brattind av Tromsø. Over 70 år seinare vart vrakrestar funne nord for Island. Eit omfattande arbeid med å identifisere funnet viste at restane stemde frå Brattind. No skal historia om skuta og menneska som aldri kom heim, løftast fram på Ishavsmuseet.
Fredag 9. oktober inviterer Ishavsmuseet til Polarkveld i Brandal, der forfattar og foredragshaldar Johannes Bjarne Alme vil fortelje om Vesteris-tragedien og det store detektivarbeidet med å identifisere vrakrestane etter Brattind.
Funnet vart gjort av den islandske trålaren Videy nordvest for Island, og var det første konkrete funnet av vrakrestar etter Vesteris-ulykka. Identifiseringa vart eit viktig stykke dokumentasjon av ei tragedie som framleis har ein sterk plass i minnet til familiar og lokalsamfunn langs kysten, og spesielt på Sunnmøre og i Troms. Skipper og reiar på Videy kjem til museet denne kvelden.
Ny modell av Brattind
Eit høgdepunkt under Polarkvelden vert avdukinga av ein ny modell av Brattind. Modellen er bygd av Vebjørn Møller, ein prisbelønt modellbåtbyggar frå Reine i Lofoten.
Møller vil sjølv vere til stades under arrangementet og fortelje om arbeidet med å gjenskape ishavsskuta i modell.
Modellen skal avdukast av Christian Rieber, som har vore sterkt involvert i norsk ishavshistorie. Rieber var sjølv reiar av ei av dei andre skutene som forsvann i samband med Vesteris-tragedien.
– For Ishavsmuseet handlar dette først og fremst om menneska. Vi skal ta vare på historia om dei som reiste ut på ishavet, dei som aldri kom heim, og familiane som sat att. Modellen av Brattind gjer historia konkret og synleg for nye generasjonar, seier dagleg leiar Webjørn Landmark.
Ein kveld for minne og formidling
Polarkvelden vert også eit kulturelt arrangement. Ronald Øvrelid deltek med song, skipperen på Videy, og ordførar i Hareid, Bernt Brandal, tek del i programmet.
– At vi no kan vise fram ein modell av Brattind, etter at vrakrestane vart identifiserte så mange år etter tragedien, er eit sterkt høve til å fortelje historia på nytt. Vi håpar kvelden kan vere både lærerik og verdig, og at han kan bidra til å halde minnet om dei 79 som omkom, levande, seier Webjørn Landmark.
Ishavsmuseet ønskjer publikum velkomne til ein kveld med sterke historier, ny kunnskap, musikk, avduking og godt samvær – i eit museum som sjølv er tufta på å ta vare på historia om menneska, skutene og livet på ishavet.
Kvelden vert avslutta rundt matbordet
Etter programmet inviterer Ishavsmuseet til eit godt måltid. Det vert servert nydeleg kveite med tilbehøyr, og lun eplekake til dessert Mat og samvær har alltid vore ein viktig del av kystkulturen, og også denne kvelden skal det vere rom for samtale og ettertanke etter eit program med sterke historier.
Påmelding for middag.
