23/06/2026
To utstillingar opna i Hovden Kunsthandel: Kunst, musikk og tradisjon i sentrum
HOVDEN: Laurdag 20. juni opna Bykle og Valle kunstlag to sommarutstillingar i Hovden Kunsthandel galleri. Med Landskappleiken på Hovden som bakteppe i år, er temaet for begge utstillingane musikk, dans og setesdalske tradisjonar.
Hovudutstillinga har fått tittelen «Når bileta vaknar» og er vigd kunstnaren Olav Bjørgum, ein av Setesdals mest folkekjære kunstnarar.
Utstillinga presenterer grafikk og måleri av folkekunstnaren Olav Bjørgum og gjev eit innblikk i hans rike kunstnarlege univers, der musikk, dans og folkeliv står sentralt. Bjørgum hadde sjølv stor glede av musikken, noko som kjem tydeleg til uttrykk i fleire av verka hans. Publikum får sjå fleire av Bjørgums mest kjende motiv, men også sjeldnare verk som viser andre sider av kunstnarskapen gjennom både teknikk og uttrykk.
Dei fleste bileta er lånte frå Setesdalsmuseet, medan nokre kjem frå private samlingar. Bykle og Valle kunstlag rettar ei stor takk til Setesdalsmuseet og dei private utlånarane som har gjort utstillinga mogleg.
Som eit spennande supplement til utstillinga har kunstlaget invitert grafisk designar Maija Uleberg til å lage ein lys- og musikkinstallasjon. Her er Bjørgums bilete «Setesdalsganger» animert og sett i rørsle, slik at kunstverket får nytt liv og eit nytt uttrykk. Installasjonen blir akkompagnert av musikk framført av Endre Stulien Robstad, og gir publikum ei levande og sanserik kunstoppleving.
Den andre utstillinga, «Gjenklang», er ei medlemsutstilling der kunstnarar frå Valle og Bykle viser eigne arbeid. Her møter publikum eit mangfald av uttrykk – måleri, keramikk, glas, trearbeid og akvarellar. Felles for alle verka er at dei hentar inspirasjon frå rytmar, musikk, tradisjonar og kulturarven i Setesdal, tolka på kvar sin personlege måte.
Det møtte fram mykje folk til opninga, og stemninga var god. Dei mange frivillige som har arbeidd med førebuingane gjennom fleire dagar, kunne glede seg over ei vellukka opning og stor interesse frå publikum.
Begge utstillingane blir ståande i Hovden Kunsthandel galleri gjennom sommaren, fram til august. Kunstlaget ønskjer både fastbuande og tilreisande velkomne til ei kunstoppleving der bilete, musikk og tradisjonar møtest på ein inspirerande måte.
