16/06/2026
Snorklypping for Handverkartunet!
Me har markert mykje det siste året – og det er fordi eit stort og mangeårig utviklingsarbeid har materialisert seg i fleire store delprosjekt som kvar for seg fortener sin eigen fanfare.
På fredag markerte me ikkje berre ferdigstillinga av fleire delprosjekt, men òg at det overordna utviklingsprosjektet Tett på no er i mål. Kulturdepartementet, Vestland fylkeskommune og Kvam herad har vore solide økonomiske støttespelarar.
Ordførar Torgeir Næss har vore med på store delar av reisa og kom, som vanleg, med treffande og gode ord då han offisielt opna Handverkartunet.
Med oss denne dagen hadde me arkitekt Solveig Valland frå Geoplan AS, utførande Åsane Byggmesterforretning og støttespelarar frå Sparebanken Norge. Prosjektleiar emeritus Geir Madsen var òg til stades og kunne skåla for at mange års arbeid har bore frukter.
Me markerte òg det nye aktivitetsbaserte formidlingstilbodet vårt, som er utvikla ved senteret under leiing av Silje Ensby, med god hjelp frå handverkarane våre. Tilbodet er finansiert med støtte frå Vestland fylkeskommune, Kvam herad, Bergesenstiftelsen og UNESCO-kommisjonen.
Til slutt gjekk turen inn i filmsalen, som me er svært takksame for at Sparebanken Norge støtta, slik at me fekk både amfistolar og teknisk utstyr med universell utforming. Auditoriet er ein viktig ressurs for utdanningane som har samlingar hjå oss, og vert flittig nytta til seminar, førelesingar, føredrag og filmvisingar.
Utstyr er bra, men godt innhald er endå viktigare. Fram mot opninga av den nye filmsalen har Randi Storaas arbeidd med å restaurera dei historiske filmane som er hjartet i den kulturhistoriske formidlinga vår. Dette har vore mogleg takka vere støtte frå Eckbos legat, Vestenfjelske bykreditts stiftelse og Bergesenstiftelsen.
No går me ein travel sommar i møte og håpar å sjå deg her som gjest.☀️
Foto: Silje Ensby/Hardanger fartøyvernsenter
