Møbelmuseet

12/05/2026

Fire kvinner på tur til musea på Sunnmøre for å få inspirasjon til drift av eigne museum i Østerrike. Det vart ein del aha-opplevingar i utstillinga til Møbelmuseet for kvinnene. Nokre er både mødre og bestemødre og hadde i mange år hatt Tripp Trapp-stolen i heimen. Balans-stolen til Stokke og Stressless-stolen er òg kjende møblar i Østerrike. Men at desse møblane er laga i Norge var ukjent for alle. Skandinavisk møbeldesign er helst svensk eller dansk. No veit dei betre!
Østerrike har også rike møbeltradisjonar, og verdas kanskje mest kjende stolmodell, Thonet-stolen, kjem frå alpelandet. Det var kjekt for kvinnene og finne ein Thonet-stol blant miniatyrmodellane som er utstilte i museet. Stolane vert framleis laga, men er vurderte som nokså eksklusive og dyre møblar.
Neste stopp for kvinnene var Brudavolltunet i Ørsta.

05/05/2026

Møbelvener er gode å ha, til dømes når ein skal lage til ei ny utstilling. 21. juni opnar Møbelmuseet ei utstilling der temaet er sittereiskap gjennom historia: frå fjøskrakken til saccosekken. Magnar Vigstad og Ole Vedvik i venneforeininga til museet er godt igang med å måle veggar og gjere klart for opphenging av gardiner. Om ikkje lenge skal møblar og tekstar på plass. Vi er i rute:)

24/04/2026

Oppfinnarbesøk på Møbelmuseet i dag. Frode Skretting frå Nærbø på Jæren, starta yrkeskarrieren som bygningsmann og murar. På grunn av ein beinskade omskulerte han seg til fysioterapeut i 2011. I yrket sitt såg han at mange fekk ryggplagar på grunn av statisk sitting over lang tid. Dette galdt også born og unge som sit i time etter time på stive skulestolar.

Frode ville gje skuleborna sittereiskapar som tillet dei å røre seg også i sittande stilling. Det starta med sitteballar og endte opp med Rodeostolen som både er morosam og kroppsvennleg. Stolen finnast både i barne- og vaksenstørrelse.

No skal stolen, som i 2015 fekk Norsk Designråds merke for god design, få ein sentral plass i Møbelmuseet si nye utstilling om sittereiskapar gjennom tidene.

Hoppla hei!

16/04/2026

No skjer det ting på Møbelmuseet. I to år har vi vist fram norsk sofahistorie gjennom
100 år. No er den utstillinga montert ned og vi har byrja å lage til for ny utstilling i rommet vårt for skiftande utstillingar. No vil vi vise fram spennande stolar frå dei første tider og fram til i dag. Vi set fokus på korleis menneska har løyst behovet for å finne støtte for kroppen og kvile, frå dei tidlegaste tider og fram til i dag. Vi går frå stein og trekubbar til dei mest moderne sittemaskinar.
Utstillingsarkitekt Marit Kjærstein har kome langt i planlegginga, og mellom stolane ho har plukka ut til utstillinga er denne raude godbiten designa av Verner Panton og produsert av HÅG.

09/04/2026

Sykkylven vidaregåande skule har opp gjennom åra utdanna mange til arbeid i møbelindustrien. Det har også den polske vennskapskulen i Oswiecim i sør-Polen. Det er ein vidaregåande skule med ei rekkje tekniske fag, frå IT til snikkarfag. No er ei gruppe lærarar frå skulen på besøk i Sykkylven, og eit besøk i Møbelmuseet stod høgt på ønskelista.

Polen er eit land med ein allsidig møbelproduksjon, og mange polske bedrifter er underleverandørar til norske trevarebedrifter. Av dei utstilte møblane i museet peika dei raskt ut Tripp Trapp som ein stol dei kjende. Ein av lærarane tok fram eit bilete frå mobilen med dottera sitjande på ein Tripp Trapp-stol heime. Den som var mest interessant å prøve var likevel den litt rare Ekstrem-stolen. Den hadde dei ikkje sett før, men dei fann raskt ut at det var mange måtar å sitje på i stolen. Nett slik designaren, Terje Ekstrøm, inviterte til.

06/04/2026

Spennande jobbmulegheiter i Viti-musea. Blant anna på Møbelmuseet i Sykkylven. Hiv deg rundt og søk. Søknadsfrist 10. april.

Er du vår nye kollega? 👋🏼 Snart søknadsfrist for flere spennende jobbmuligheter i Viti!

I avdeling for kunst og design søker vi etter en kurator til Møbelmuseet, en konservator til Jugendstilsenteret og en museumsmedarbeider til Anders Svor-museet. Søknadsfrist 10. april. Se link i kommentarfeltet og søk! ✨

24/03/2026

Møbelmuseet har fått ei flott gåve frå Vigdis Mørkedal i Molde: fire fyldige katalogar med produktbilete frå P.I. Langlo på Stranda. Vigdis Mørkedal skreiv i 1997 ei hovudfagsoppgåve i kunsthistorie om møbelindustrien på Sunnmøre dei første femti åra. (Møbelmuseet fekk trykt opp oppgåva og har ho til sals.) I samband med dette arbeidet, fekk ho inn bilete frå pionerbedriftene, mellom dei P.I. Langlo.
Av bileta i katalogane ser vi at variantbreidden til Langlo var stor. Her var både tunge salongar, lettare stolar, gyngestolar og sovesofaer. Dei første åra var modellane utvikla på fabrikken. Utover i 1950-åra nytta bedrifta profesjonelle designarar. Arne Halvorsen var blant dei som teikna møblar og skapte fornya interesse rundt kolleksjonen til Strandabedrifta.
I 1979 vart ho kjøpt opp av J.E. Ekornes i Sykkylven.

13/03/2026

Interessert i møbeldesign og møbelhistorie? Då kan denne stillinga vere noko for deg. Ledig stilling no som kurator ved Møbelmuseet.

Opplev kunst og kultur på Sunnmøre

03/03/2026

Frå 1. mars vart det endringar i organisasjonsstrukturen i Viti, for å sko museet for framtida. Møbelmuseet, som tidlegare har vore plassert i kulturhistorisk avdeling, flyttast over til kunstavdelinga som skiftar namn til avdeling for kunst og design.

Avdelinga har den faglege leiinga av Jugendstilsenteret og KUBE i Ålesund, samt Anders Svor-museet i Hornindal

Opplev kunst og kultur på Sunnmøre

28/02/2026

Alle veit at det har vore laga stolar, sofaer og bord i Sykkylven gjennom mange tiår. Færre kjenner til den lokale lampeproduksjonen. Onsdag fokuserte Møbelmuseet på denne nokså ukjente delen av den lokale industrihistoria.
Allereie tidleg i 1940-åra fekk vi den første reine lampebedrifta her, INO armaturer. Dei laga lampettar og stålamper, dei fleste med vakkert utforma treskurd. På samme tida tok fleire privatpersonar opp produksjonen av lysekroner. I to tilfelle vart dette starten for det som seinare vart reindyrka møbelbedrifter; Hole og Lillebøe og Brdr. Hole trevarefabrikk.

Den mest kjende lampefabrikken i Sykkylven var Ideas. Den vart etablert i 1981 av Terje Lade. Det var designaren Jan Erik Lindgren som teikna lampene som fann kjøparar både i Norge og i utlandet. På arrangementet onsdag fortalde produksjonssjef i Ideas, Alf Høydalsvik, om arbeidet med å utvikle produkta og å få tak i alle komponentane som måtte til for å få lampene funksjonelle, og ikkje minst formfullendte.
Mange har Ideas-lamper i stovene sine enno, og dei har tålt tidas tann, og verkar like moderne i dag som for 45 år sidan.

23/02/2026

Møbelmuseets historikar stiller gjerne opp når det kjem invitasjonar til å halde foredrag om møbelhistoria. I dag var det besøk i måndagstreffet i Sykkylven kyrkje, og tema var det grunnleggjande spørsmålet: korleis gjekk det til at Sunnmøre vart det sentrale området for møbelproduksjon i Norge? Utganspunktet til sunnmøringane var ikkje det beste, Sunnmøre var langt frå dei store marknadane, og materialar til produksjonen måtte hentast langt vekke frå. Lite pengar og få eigna bygg til produksjonen var det også i pioneråra tidleg på 1900-talet.
Det dei hadde var arbeidsvilje og pågangsmot og ein ny måte å organisere produksjonen på. Dei hadde lært arbeidsdeling og arbeidsflyt av Henry Ford. Kvar arbeidar fekk spesialisere seg på ein avgrensa del av produksjonen, og dei fekk betalt etter kor mykje dei produserte. Møblane var billegare enn konkurrentane sine, og det vart ein viktig inngangsbillett til dei store marknadane nord og aust i landet.

Det byrja på Stranda, men i dag er det Sykkylven som er møbelhovudstaden. Her vert mellom anna verdas mest kjende kvilestol, Stressless, laga. Ganske fantastisk eigentleg!