12/07/2023
DHACDO. Furashadda sida qalbiyanka ah iyo damiir hadlayada dareenkiisa oo dhan.
Fadlan iska kay cafi/cafiya iiguna duceeya in illaahay igu dhibin iina fududeeyo jidka iyo su'aalaha.🙏
"Waa hoos aduunyadu"
"Waana laba ayaamood"
Aduunka illaahay oo waayaha jacayl-jabka qayb ka tahay waxay mar qudha daadisaa qof kasta waxuu dhoodhoobayay oo xaalad ahaan u doorisaa. Dhaawaca iyo qalbi roganka waa mid ka turjuma badankeedu xasuusta mudada dheer ku mataansan nafta, mar waxuu dareemaa seexan waaga, dhacdiid iyo af dhabaan-dhab u hoos ula ooyo.
Xasuuswadareedka qalbiga ku duugan waa laba wax oo isdhammaystira, oo isaseegoodu midba kankale dhantaalayo la'aantiis makala maarmaan oo waa isu dhigmaan, waana is dheelitiraan. Ku waasi waa caalamka nolosha iyo caalamka jacaylka in la tartansiiyo waa caqlidarro iyo in aan la rabin wadajirkooda, waxaa se fiican wadajirka howlahay ku fulin jireen ku sii wadaan si aadku dunida ugu waadho.
Waxaa caqli iyo cilmi ah in labada qof dareenka iyo baahiyaheeda nololeed u sinaato iyada oo aan xintamayn ee xilkasnimo iyo dulqaad ku wada. Waxa jira maalmo, saacado, bilo iyo sannado adag oo waxaa han iyo himilo kalahayd kula dheeliyaan.
Naxariis iyo macaan maleh adduunyadu waa nac iyo naaqus, waa imtixaan iyo ciqaab waa lur iyo kadeed, se waxaan ku muujin karnaa gubashada gudaha qalbigeena. Ma jiro qof awoodda adkaysiga go'aankiisa se waa ismoodsiis, ma aha daawo rasmiya se waa naar iyo nabar kale aad ku mudatid caloolyow, catow, calaacal, illintuna maaha ooyin se waa dhimbil dhabankaaga ku dhacda.
Hadii wed ku daayo, dunidu dugsi maleh maalintu waa suuxiso, habeenku waa kafan, sannadkuna waa naxash, maxaa ka kulul oo ka xanuun badan adigoo nool inaa dhimato. Culayska gudaha laga dareemona xanuun kaga cabsanmaysid, geerina kaga cabsanmaysid e sharafta dhig, qofnimada dhig, dadnimada dhig, qaneecada dhig, kartida dhig, sababto ah naftaaddaa dareen iyo daryeel gaaban.
Ma taqaan waxaan sidaa u iri!!. Waxaan inoo diidayaa ina qayb ka noqono duni qalbi-jab iyo qahar ah oo raxmad lahayn, oo qurux lahay, oo xiiso iyo qaneeco xambaar sanayn. Garowso hadaa waydo qof aad jeceshahay ma jiro cid gacanta kuu soo qabanaysa se waa qadar, waa nasiib iyo waa calaf waxa idin kala geeyay baa si sahlan lagu oran.
Dhammaantood wey kugu cidleynayaan daruufaha adag, weliba kaa hor imanayaan qaarkood, ma fahmayaan waxaad u baahantahay, helimaysid cid ku dhegaysata oo dhimbisha naareed kaa bakhtiisa, balse waxay ka kaluumaysanayaan duruuftaa ku sugantahay. Waqtiguna baryo lagugu naco buu kaaga idlaadaa oo waxaa kororsataa karah.
Waxba ku tarimaayaan, wax kuuma soo wadaan, wax kugu biirinmaayaan, waxna kugu kordhinmaayaan, halkaa joogno laysuma arxamo, oo nolosha aduunkan diciifka ah waxaa xaq u leh dulmilaha iyo danaystaha. Hadaan moodayo jacaylka in sidan loogu hungoobo ma aamineen, uma welweleen, waqti masiiyeen, cimrigayga iyo naftaydana kuma lumiyeen.
Se sida kansarka dhiiga ku dhaca xubnaha kale ugu faafo ayuu jacaylkaaguna sidaa qalbigayga ugu dhacay xubnaha kalena wada qabsaday. Sida bukaanku uga agdhowado dhaktarka ayaan u doonaa meelaa joogtid inaa ka agdhowaado.
"Adna maalo sii joog"
"Ana moodku haydilo"
Dunida waxaa ka soo galay albaab yar waxay igu soo dhowaysay farxad waxaase kaga baxday murugo, waa koriso, kibriso iyo kufiso. Maxay ii tartay oo ka dhaxlay?!. Adkayso, dareemada qarso, laabtaada gacalada ka guuxaya dadka kale yay ogaan, jiljileec iyo debecsanaan ha muujin, indhaha ilmada ka cesho bay la soo boodayaan, ama waxaa sidaa iyo sidaa u samaynwayday bay ku daacdaacsadaan.
Rakuubka iyo layliga aduunyada dib u eeg intaadan hami iyo hawo aduun mudan, ma joogno caro dareenka xodxodashada laga wayneeyo ama laga xuso jacaylka oo raaxo iyo raasba wax laga dheefo. Gudoon oo ku xasil dareenkaaga doonka ah aan dergankarayn.
Fahantay!? gartay oo garatay inay jirto labo duni. Dhabtii waa labo kala foolxun se Loollan gudeed oo aad u adag iyo gocashooyin aad u daran kadib waxaa isku qaaday caalamka haysta xirfada dilka oo nolosha birta ka asla. Aduun i khatalye Nabad-galyay oo kala dhammaanay.
"Waa geeri caashaqu"
"Waa guul dariyo ciil"
"Waa garabsi jiilaal"
"Waa babadaniyo dhaxan"
---Adan Tarabi
W/Q. Awil Abdullahi A Amay
