07/09/2025
UCK : Under Chicken ขอเชิญเข้าร่วมกิจกรรมส่องจันทร์สีเลือด จันทร์ทรุปราคาเต็มดวง คืนบุญข้าวสาก บุญห่อข้าวใหญ่ ร่วมระลึกถึง พูดคุย แลกเปลี่ยนเกี่ยวกับเพื่อนร่วมทางที่จากไปแล้ว สนใจร่วมกิจกรรมอย่าลืมถือติดไม้ติดมือมา
*โปรดอย่ามาตัวเปล่า*
Location : ลานกิจกรรมหินล้านสี KULTX
Date & Time : 7 กันยายน 2025 เวลา 3 ทุ่ม เป็นต้นไป ถึง จันทรคราสออก
ตกมาเดือนสิบคล้อยลมวอยวอยก้ำฝากป่า
ข้าวอยู่นาปลายอยู่ห้วยความบักตู้เล่นขี้ต่ม
ฟังเสียงลมพานพ่าวสีหนาวหนาวจ้าวหน่ำ
ฝนตกหน่ำภาคพื้นดินบ่แห้งหากซุมเลิง
มาตอนนี้สิได้เริ่มจักปากกาเขียนประพันธ์
นำมาเป็นข้อคิดจิตประสงค์ทำบุญสร้าง
อย่าลืมทานเททอดสอดคัมภีร์ฟังพระเทศน์
อุทิศเผตรอยู่บ้านบุญนั้นให้แต่งทาน
เฮียมจักปุนแปลงปั้นคำเก่าโบราณเฮา
เรียนวิชาจากผู้เฒ่า คงไว้บ่ให้สูญ
ไผผู้ปุนแปลงฮู้ คำสอนนักปราชญ์
หากสิอาชญ์อยู่พื้น โลกาใต้มนุษย์เฮา
ให้เฮาคงเอาไว้ คำดีของเฒ่าแก่
พ่อและแม่นบไหว้ นำเจ้าสุยาม
ฟังเยอท่านสิเว้าเรื่องต่อไป
ฟังสิไขวาจาเว้าเป็นความฮู้
ดูตามบทกวีไว้บ่ให้ไลของเก่า
บุญข้าวสากแต่เค้าเฮาได้แต่งทำ
ผะดับดินกาลนั้นบุญมาสิได้กล่าว
บุญข้าวสากนี้ละเจ้าของต้อนหมู่ผี
หลังจากยมพิบาลได้ปล่อยสัตว์ผีเปตร
ให้มาเยี่ยมพี่น้องเป็นวันมื้อหนึ่งคืน
สิได้คืนมาห้องนิรยกาหม่องเก่า
รอของฝากจากหมู่เจ้าให้เฮาได้แต่งผลา
แบ่งออกเป็น ๓ ส่วนเด้อป้าสิแจ้งต่อปฎิบัติ
เอามาเป็นบรรทัดในบุญเดือนนี้
๓ ส่วนนี้มีหยังสิไขป่อง ท่านเอย
ให้มันล่องล่องน้ำคือปานฟ้าหลั่งฝน
ข้อหนึ่งนั้นให้เฮาแต่งทานสร้างถวยคุณพระเทศน์
แต่งผลาแต่เช้าอย่าเมาค้านอยู่นอน
หลังจากเพลจังหันต้องให้ห่อข้าวใส่ใบตอง
เอาของคาวของหวานเงินเหรียญนำพร้อม
ไปฮองวางไว้ในอารามวัดที่อยู่
บอกกล่าวพวกแม่ตู้ใหฟ้ท่านมารับทาน
ข้อสามนั้นอย่าได้ลืมทำสร้างศีลทานเทเทศน์
สวดมนต์อุทิศเผตรนั้นในวัดกว้างค่ำยาม
อย่าลืมเด้อพวกท่านให้เฮ็ดปฏิบัติ
เอาให้มันคักคักประเพณีเฮานี้
ตกมาฮอดเดือนนี้ลมหนาววอนมาอีกแหล่ว
วอนวอนซุงหมู่พิณนากว้าง
เหลียวเห็นปวงคณาเซื้อญาติกาพ่อแม่
สุขสบายบ่ยากแท้เดือนนี้ว่างงาน
ฟังเสียงกบโตนน้ำปลาอยู่นาน้ำแห้งขอด
เสียงกะบอกหลั่นก้องอยู่ในบ้านหมู่เฮา
แนมเห็นซุมผู้เฒ่าได้พักเวียกจักสาน
บางพ่องนอนฟังลำอยู่ประจำแคมฮั้ว
วาดกะสินร้องลำทำนองอีกขอนแก่น
ลำผญาอุบลพร้อมฟังแล้วม่วนมโน
ขอประกาศอย่างโก้ๆอย่าละฮีตเฮาอีสาน
ประเพณีทำทานแต่งบุญถวายสร้าง
อุทิศทานหาเจ้าญาติกาผู้ตายจาก
บุญข้าวสากจบท่อนี้สิลงไว้ก่อนละคุณ.....
About : บุญข้าวสาก หมายถึงประเพณีที่เอาได้แต่งทานทานเอิ้นว่าห่อข้าวน้อย เป็นของฝาก ญาติที่ตายแล้ว มีความเกี่ยวข้องกับบุญข้าวประดับดิน คือบุญข้าวประดับดินที่ทำมาก่อนนั้นท่านเรียกว่าของต้อน คือของที่ไว้ต้อนรับพวกผีที่เป็นญาติที่มารับทาน ส่วนบุญข้าวสากคือของฝากญาติที่จะไปเมืองสวรรค์ หรือนรก บุญข้าวสากนี้ถ้าใครทำพวกผีญาติพี่น้องก็จะอวยพร ให้อยู่สุขสวัสดีอย่ามีทุกข์อะไรต่างๆไป ส่วนที่ไม่ทำเขาก็จะสาบแซ่งว่า สาธุเด้อมันตายอย่าได้กลิ่นหฟ่อข้าว มันบ่ฮู้ทำสร้างกุสลทานปันส่วน ให้มันทุกข์ยากไฮ้ไฟฮ้อนให้เกิดมีแด่ถ้อน
#เดือนสิบบุญข้าวสาก
#บุญข้าวสาก #บุญห่อข้าวใหญ่
