Tuol Sleng Genocide Museum

06/10/2026

សិក្ខាសាលាលើកទី៣ ស្តីពី “ការពិនិត្យពង្រាងលើកទី១ អំពីវិធីសាស្ត្របង្រៀន និងការបញ្ជ្រាបការអប់រំ ពលរដ្ឋ​សកល​ក្នុង​សៀ​វ​ភៅណែនាំ​គ្រូ​បង្រៀន​ទាក់ទង​នឹងមេរៀនប្រវត្តិសាស្ត្រសម័យខ្មែរក្រហម សម្រាប់មធ្យម​សិក្សា​ចំណេះទូទៅ”..........................................................

ចាប់ពីថ្ងៃទី៥ ដល់ថ្ងៃទី៦ ខែតុលា ឆ្នាំ២០២៦ សារមន្ទីរ​ទួលស្លែង សហការ​ជាមួយក្រសួងអប់រំ យុវជន និងកីឡា ដោយទទួលការគាំទ្រពីការិយាល័យអង្គការយូណេស្កូប្រចាំទីក្រុងភ្នំពេញ និង​សារមន្ទីរ Holocaust បានរៀបចំ​សិក្ខា​សាលា “ការពិនិត្យពង្រាងលើកទី១ អំពិវិធី​សាស្ត្រ​បង្រៀន និង​ការ​បញ្ជ្រាប​​ការ​អប់រំ​ពលរដ្ឋ​សកល​ ក្នុង​សៀ​វ​ភៅណែនាំ​គ្រូ​បង្រៀន​ទាក់ទង​នឹងមេរៀនប្រវត្តិសាស្ត្រ​សម័យ​ខ្មែរក្រហម សម្រាប់​មធ្យម​សិក្សា​ចំណេះ​ទូទៅ” ដែលមានការចូលរួម មន្រ្តី​និង​បុគ្គលិក​សារមន្ទីរ​ទួលស្លែង មន្ត្រី​ក្រសួង​អប់រំ យុវជន និងកីឡា អ្នកប្រឹក្សាជាតិរបស់អង្គការយូណេស្កូ និង គ្រូបង្រៀនឯកទេស​ប្រវត្តិវិទ្យា ចំនួន ២២ រូប។

សិក្ខាសាលានេះ រៀបចំឡើងក្នុងបំណង ពិនិត្យសេចក្តីពង្រាងលើកទី១ នៃសៀវភៅណែនាំស្តីពីវិធីសាស្រ្តបង្រៀន សម្រាប់​ជំនួយដល់ការរៀននិងបង្រៀនមេរៀនប្រវត្តិ​សាស្រ្ត​សម័យខ្មែរក្រហម។ សិក្ខាសាលានេះ នឹងប្រមូល​ធាតុចូល​ពីភាគីពាក់ព័ន្ធ និងពិនិត្យពីប្រភពផ្សេងៗ ដើម្បីធានាបាននូវភាពត្រឹមត្រូវតាមបរិបទ​ប្រវត្តិសាស្រ្ត និងប្រសិទ្ធ​ភាពនៃវិធីសាស្រ្តបង្រៀន (បែបគរុកោសល្យ) និងបន្ស៊ីគ្នា រវាងខ្លឹមសារសៀវភៅសិក្សាគោលថ្នាក់ទី៩​ និងថ្នាក់ទី១២ របស់​ក្រសួង​អប់រំ យុ​វជន និងកីឡា ជាមួយនឹង ​សៀវភៅណែនាំស្តីពី “វិធីសាស្រ្តបង្រៀនប្រវត្តិ​សាស្រ្ត​ខ្មែរក្រហម” របស់​សារមន្ទីរ​ទួល​ស្លែង ព្រមទាំងរួមបញ្ចូលក្របខណ្ឌគំនិតនៃការអប់រំពលរដ្ឋសកល។

06/10/2026

ពិធីបុណ្យកាន់បិណ្ឌ-ភ្ជុំបិណ្ឌ និងបង្សុកូលឧទ្ទិសកុសលជូនជនរងគ្រោះដែលបាត់បង់ជីវិតក្នុងរបបប្រល័យពូជសាសន៍ ប៉ុល ពត

ថ្ងៃចន្ទ ទី៥ ខែតុលា ឆ្នាំ២០២៦
ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីមុខងារសាធារណៈ តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និង លោកជំទាវបណ្ឌិតសភាចារ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញជាអធិបតីភាពក្នុងពិធីសូត្រមន្ត បង្សុកូល និងរាប់បាត្រ ដើម្បីឧទ្ទិសកុសលជូនដល់ជនរងគ្រោះដែលបាត់បង់ជីវិតក្នុងរបបប្រល័យពូជសាសន៍ ប៉ុល ពត នាឱកាសបុណ្យភ្ជុំបិណ្ឌ។ ពិធីនេះ ក៏មានការចូលរួមពីថ្នាក់ដឹកនាំ​ក្រសួង​ស្ថាប័ន​នានា​នៃរាជរដ្ឋាភិបាលកម្ពុជា ស.ស.យ.ក សាលារាជធានីភ្នំពេញ និងសាច់ញាតិជនរងគ្រោះ រាប់បាត្រព្រះសង្ឃចំនួន ៤៧អង្គ ដើម្បីឧទ្ទិសកុសលជូនជនរងគ្រោះដែលបាត់បងជីវិតនៅគុកទួលស្លែង និងនៅទូទាំងប្រទេស ក្នុងរបបប្រល័យពូជសាសន៍ ប៉ុល ពត (៣ ឆ្នាំ ៨ ខែ និង ២០ ថ្ងៃ) ដែលបញ្ចប់ទៅកាលពី ៤៧ឆ្នាំមុន និងវីរៈកងទ័ពដែលបានពលីសាច់ស្រស់ឈាមស្រស់ដើម្បីការពារជាតិមាតុភូមិ។

ឆ្លៀតក្នុងឱកាសនេះ ឯកឧត្តម ឧបនាយករដ្ឋមន្រ្តី ក៏បានអញ្ជើញទស្សនកិច្ចស្វែងយល់អំពីស្លាកស្នាមប្រវត្តិសាស្ត្រ និងឯកសារដែលតម្កល់ទុកនៅបណ្ណសារដ្ឋានសារមន្ទីរទួលស្លែង។

05/10/2026

05/10/2026

01/10/2026

វគ្គបណ្ដុះបណ្ដាល “ការអភិរក្សវាយនភណ្ឌ” នៅសារមន្ទីរទួលស្លែង

ផ្នែកអភិរក្សនិងជួសជុលនៃសារមន្ទីរឧក្រិដ្ឋកម្មប្រល័យពូជសាសន៍ទួលស្លែង បានរៀបចំវគ្គបណ្តុះបណ្តាលស្តីពី “ការអភិរក្សវាយនភណ្ឌ” រយៈពេល៤សប្ដាហ៍ ដល់និស្សិតចំនួន៣នាក់។ ក្នុងបំណងចែករំលែកចំណេះដឹង ជំនាញ ការថែរក្សា និងការអភិរក្សវាយនភណ្ឌ។
វគ្គបណ្ដុះបណ្ដាលនេះបែងចែកជា៤ដំណាក់កាលរួមមាន៖
១)-ទ្រឹស្តីទូទៅនៃការងារអភិរក្សវាយនភណ្ឌ
២)-ការអនុវត្តផ្ទាល់របៀបដេរថ្នេរដៃលើក្រណាត់
៣)-ដំណើរការនៃការចុះបញ្ជីសារពើភណ្ឌសម្អាតនិងការងារថែរក្សាសមុច្ច័យ
៤)-ដំណើរការររៀបចំពិព័រណ៍វាយនភណ្ឌ

01/10/2026

សារមន្ទីរទួលស្លែង មានកិត្តិយសសូមជម្រាបជូនដំណឹងដល់សាធារណជនមេត្តាជ្រាបថា៖ ក្រសួងវប្បធម៌ និងវិចិត្រសិល្បៈ នឹងរៀបចំពិធី បុណ្យភ្ជុំបិណ្ឌនៅសារមន្ទីរទួលស្លែង ដោយមានកិច្ចសូត្រមន្ត និង រាប់បាត្រព្រះសង្ឃចំនួន ៤៧អង្គ ដើម្បីឧទ្ទិសកុសលជូនដល់វិញ្ញាណក្ខន្ធជនរងគ្រោះ ដែលបាត់បង់ជីវិតនៅមន្ទីរ ស-២១ ក្នុងសម័យខ្មែរក្រហម និងបុព្វការីជន នៅថ្ងៃទី៥ ខែតុលា ឆ្នាំ២០២៦ វេលាម៉ោង៧:០០ព្រឹក។

អាស្រ័យដូចបានជម្រាបជូនខាងលើ សូមសាធារណជន អញ្ជើញចូលរួមតាមសទ្ធាជ្រះថ្លារៀងៗខ្លួន ។

សូមអរគុណ!

30/09/2026

“សិក្ខាកាម IPHGE ទស្សនាសារមន្ទីរទួលស្លែង”
----------------------------
នៅព្រឹកថ្ងៃទី២៩ ខែកញ្ញា ឆ្នាំ២០២៦ លោក ហង្ស និស្ស័យ ប្រធានសារមន្ទីរទួលស្លែង​ រួមទាំងមន្រ្តី និងបុគ្គលិកសារមន្ទីរ បានទទួល​ស្វាគមន៍ ​សិក្ខាកាម​នៃ​កម្មវិធី​អន្តរ​ជាតិ​ស្តីពី ការអប់រំអំពីការសម្លាប់រង្គាល និងអំពើ​ប្រល័យ​ពូជ​សាសន៍​៖ វគ្គបណ្តុះ​បណ្តាល ស្តីពី “ការអប់​រំ​អំពី​ជម្លោះអតីតកាល”ចំនួន ៤៥នាក់ (ស្រី​ ១៥នាក់)។

ក្នុងដំណើរទស្សនកិច្ចនេះ សិក្ខាកាមបានទស្សនាស្លាកស្នាមប្រវត្តិសាស្រ្ត ពិព័រណ៍អចិន្ត្រៃយ៍-មិនអចិន្ត្រៃយ៍លើប្រធានបទនានាពាក់ព័ន្ធនឹងប្រវត្តិសាស្ត្រខ្មែរក្រហម កិច្ចការអភិរក្សសមុច្ច័យបណ្ណសារ វាយនភណ្ឌ លោហៈ និងគំនូសសញ្ញាតាមអគារ រួមទាំងគុណតម្លៃនានាដែលនាំឲ្យសារមន្ទីរទួលស្លែងឬបូជនីយដ្ឋានចងចាំនៃកម្ពុជាអាចជាប់ទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ។

ចុងបញ្ចប់សិក្ខាកាមបាន​បង្ហាញចំណាប់អារម្មណ៍ពេញចិត្ត និង​គាំទ្រដល់​កិច្ចការទាំងឡាយ​ដែលសារមន្ទីរ​ទួលស្លែងបានចូលរួមដោះស្រាយអំពើហិង្សាពីអតីតកាល​តាមរយៈការអភិរក្ស ការអប់រំសន្តិភាព និង​ការផ្សព្វផ្សាយអំពីឧក្រិដ្ឋកម្ម​ដែលបានកើតឡើង​នាសម័យ​ខ្មែរក្រហម ដើម្បី​ជាបុព្វហេតុសម្រាប់មនុស្សជាតិ។

29/09/2026

ទស្សនកិច្ចសិក្សាទីតាំងបូជនីយដ្ឋានចងចាំនៃកម្ពុជា...............................................

កាលពីថ្ងៃទី២២ ខែកញ្ញា ឆ្នាំ២០២៦ សិស្សានុសិស្ស លោកគ្រូ អ្នកគ្រូ មកពីសាលារៀន វ៉េស្ទឡាញន៍ សាខាច្បារអំពៅ ចំនួន ៨៥នាក់ បានមកទស្សនកិច្ចនៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដែលជាផ្នែកមួយនៃបូជនីយដ្ឋានចងចាំនៃកម្ពុជា ដើម្បីស្វែងយល់ពីប្រវត្តិសាស្រ្តអតីតមន្ទីរស-២១ ក្នុងសម័យខ្មែរក្រហម ដោយមានការសម្របសម្រួលពីមគ្គុទេសក៍របស់សារមន្ទីរ។ ទស្សនកិច្ចនេះ ជាផ្នែកមួយនៃការផ្សាភ្ជាប់ជាមួយមេរៀន ដើម្បីឱ្យសិស្សានុសិស្ស អាចយល់ដឹងបន្ថែមពីប្រវត្តិសាស្រ្តដែលបានកើតឡើងនាសម័យខ្មែរក្រហម សាវតានៃបូជនីយដ្ឋានចងចាំនៃកម្ពុជា ក្នុងន័យរួមគ្នាទប់ស្កាត់ ការពារការកើតសារជាថ្មីនាពេលអនាគត។

28/09/2026

“រូបភាពក្នុងចិត្ត”៖ ការស្វែងយល់ពីប្រវត្តិសាស្ត្រខ្មែរក្រហមតាមរយៈរូបថត
----------------------------
នៅព្រឹកថ្ងៃទី២៨ ខែកញ្ញា ឆ្នាំ២០២៦ លោក ហង្ស និស្ស័យ ប្រធានសារមន្ទីរទួលស្លែងបានចែករំលែកអំពីមូលដ្ឋានគ្រឹះនៃប្រវត្តិសាស្ត្រខ្មែរក្រហម ជូនដល់សិក្ខាកាមនៃកម្មវិធីអន្តរជាតិស្តីពី ការអប់រំអំពីការសម្លាប់រង្គាល និងអំពើប្រល័យពូជសាសន៍ (វគ្គបណ្តុះបណ្តាល ស្តីពី “ការអប់រំអំពីជម្លោះអតីតកាល”)។ ខុសប្លែកពីបាឋកថា ឬ បទបង្ហាញទូទៅ វាគ្មិនបានអនុវត្តសកម្មភាពបង្រៀនមួយហៅថា ”រូបភាពក្នុងចិត្ត” ជូនសិក្ខាកាមដែលជាអ្នកជំនាញជាតិ-អន្តរជាតិក្នុងវិស័យអប់រំប្រវត្តិសាស្ត្រ។

សកម្មភាពបង្រៀនខាងលើ បានរៀបចំឡើងដោយសារមន្ទីរទួលស្លែងនិងគ្រូបង្រៀនជាច្រើននាក់នាគ្រាកន្លងមក។ វិធីសាស្រ្តនេះមិនគ្រាន់តែផ្ដល់ឱកាសឲ្យសិស្សអាចមានសកម្មភាពផុសផុលក្នុងថ្នាក់ ប៉ុន្តែវាគឺជាវេទិកាផ្លាស់ប្ដូរមតិយោបល់ ចំណេះដឹង និងបទពិសោធន៍រវាងសិស្សនិងសិស្ស រួមទាំងសិស្សនិងគ្រូ ស្ដីពីអំពីប្រវត្តិសាស្ត្រខ្មែរក្រហម។ ជាលទ្ធផលសិក្ខាកាមក្នុងកម្មវិធីនេះ បានបង្ហាញចំណាប់អារម្មណ៍យ៉ាងខ្លាំងពីខ្លឹមសារមេរៀននិងវិធីសាស្ត្រ រួមទាំងប្ដេជ្ញាយកចំណេះដឹងនិងវិធីសាស្ត្រ ខាងលើទៅរៀបចំអនុវត្តនៅតាមបរិបទប្រទេសរៀងខ្លួន។

គួរបញ្ជាក់ថានេះ ជាលើកទី១ ដែលកម្មវិធីអន្តរជាតិស្តីពីការអប់រំអំពីការសម្លាប់រង្គាល និងអំពើប្រល័យពូជសាសន៍ បានរៀបចំនៅប្រទេសកម្ពុជា និងជាលើកដំបូងដែលកម្មវិធីនេះរៀបចំឡើងនៅទ្វីបអាស៊ី។ កម្មវិធីនេះរៀបចំឡើងចាប់ពីថ្ងៃទី២៨ ខែកញ្ញា ដល់ថ្ងៃទី១ ខែតុលា ឆ្នាំ២០២៨ ដោយមានកិច្ចសហការរួមគ្នាពីក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ អង្គការយូណេស្កូ វិទ្យាស្ថាន Levine សម្រាប់ការអប់រំអំពីការសម្លាប់រង្គាលនៃសារមន្ទីរ Holocaust Memorial សហរដ្ឋអាមេរិក និងចូលរួមដោយគ្រូបង្រៀន អ្នកជំនាញអប់រំ អ្នករៀបចំគោលនយោបាយ មកពីតំបន់អាស៊ីប៉ាស៊ីហ្វិក អាហ្វ្រិក អឺរ៉ុប រដ្ឋអារ៉ាប់ និងភាគីពាក់ព័ន្ធដទៃទៀត។